Allagarsiuteqqitaq: Pisiniarfimmi Aqutsisoq – Akiki Qeqqa Sisimiut
Pisiniarfimmi aqutsisutut aqutsinermik, tunisaqarnerup ineriartortinnissaanik sulisunillu kajumissaarinermik soqutiginnippit?
Akiki anguniagaqarfiusumik piumassuseqarluartumillu Pisiniarfimmi Aqutsisussarsiorpoq, pisiniarfiup ulluinnarni ingerlanneqarneranik, tunisaqarneranik sulisuisalu ineriartortinneqarnerannik akisussaaffeqarsinnaasumik. Uagutsinnut pingaaruteqarpoq pisiniat pitsaasumik misigisaqarnissaat aammalu sulisut suleqatigiilluarlutik ineriartornissaat.
Atorfik pillugu
Pisiniarfimmi Aqutsisutut pisiniarfiup ulluinnarni ingerlanneqarnera tamakkiisumik akisussaaffigissavat. Tuniniaanermi siuttuussaatit, sulisut aqullugit ineriartortillugillu, kiisalu pisiniarfiup pitsaasumik angusaqarnissaa qulakkeertassallugu.
Suliassat pingaarnerit
- Sulisunik aqutsineq, kajumissaarineq ineriartortitsinerlu
- Pisiniat pitsaasumik sullinneqarnissaasa qulakkeernera
- Sulisussarsiornermi, ilinniartitsinermi ineriartortitsinermilu peqataaneq
- Tunisaqarnerup, sinneqartooruteqarnerup akissarsianullu aningaasartuutit malinnaaffigineri
- Nioqqutissanik inniminniineq uninngasuutinillu aqutsineq
- Kampagninik piareersaanermi atuutsitsisarnermilu peqataaneq
- Suliffissat pilersaarusiorneri kiisalu Promark-imik atuineq
Ujartugarput tassaavoq illit
- Niuertarfinni imaluunniit kiffartuussinermik suliaqarfinni misilittagalik, aqutsisutulluunniit misilittagalik
- Aningaasarsiornermik paasinnilluartoq kisitsisinillu malinnaasinnaasoq
- Aaqqissuussaasumik suleriusilik, akisussaassusilik suleqatikkuminartorlu
- Ulapiffiusumi sulisinnaasoq aammalu pitsaasumik maligassiuisoq
Neqeroorutigaarput
- Atorfik akisussaaffeqarluartoq aammalu sunniuteqarnissamut periarfissalik
- Ulluinnaat assigiinngiiaartut unammillernartullu
- Suleqatit piginnaanillit assigiinngitsunillu tunuliaqutallit
- Inuttut sulinikkullu ineriartornissamut periarfissat pitsaasut
- Akissarsiat atorfeqarnermilu atugassarititaasut unammillersinnaasut, ilanngullugit sulisunut iluaqutissat assigiinngitsut
Qinnuteqarneq paasissutissallu
Atorfiniffissaq: Piaartumik imaluunniit isumaqatigiissuteqarnikkut.
Atorfik pillugu paasissutissanik amerlanerusunik pissarserusukkuit Tuniniaanermut Pisortaq attavigisinnaavat Gerth Kristoffersen +299 52 75 75.
Qinnuteqaatit ingerlaavartumik suliarineqassapput, taamaattumillu qinnuteqarfissap naannginnerani atorfinitsitsisoqarsinnaavoq naleqquttumik qinnuteqartoq nassaarineqarpat.
Qinnuteqaat linki quppernerup naqqaniittoq aqqutigalugu nassiunneqassaaq.
Pisiffik A/S-i pillugu:
Pisiffik A/S-i tassaavoq 56-inik pisiniarfittalik/immikkoortortalik 800-nillu sulisulik. Sulisunut suliffik pitsaanerpaajunissarput sulissutigiuarparput. Ataasiakkaanik nioqquteqartartuni Kalaallit Nunaanni annerpaat ilaat. Tunisassianik pitsaasunik assigiinngitsorpassuarnik neqerooruteqartarnikkut pitsassuarmillu pisisartunik sullisseriaaseqarnikkut, pisisartutsinnut ataavartumik niuerfigineqartuarnissarput anguniagaraarput. Nutaaliornikkut, piujuartitsinikkut sumiiffimmilu inuiaqatigiinnut nukittuumik ataqateqarnikkut, pisiniarnermi misigisaq immikkut ittoq anguniagaralugu.